LAGNAT

     Ang lagnat ay bunga ng pagtaas ng temperatura ng katawan.

PAGGAMOT NG HALAMAN
(sa lagnat na bunga ng impeksyon ng virus)

1. SUKA
      * Lagyan ng 2 kutsarang suka ang isang palanggana ng
        malamig na tubig.
      - Gamitin itong pang-pomento sa noo kung walang yelo.

2. BALIMBING
      * Pakuluan ng 10 minuto ang 2 tasa ng tinadtad na dahon sa 1/2
        galong tubig. Salain. Palamigin sa loob ng 2 oras.
      - Gamitin ito para sa malamig na pomento kung walang yelo.

3. KAMYAS
      * Pakuluan ng 15 minuto ang 3 tasa ng tinadtad na sariwang
        dahon sa isang galong tubig. salain.
      - Gamitin ang tubig para sa malamig o mainit na punas na
        paligo.

PAGGAMOT NG INIINOM
     Gamitin ang isa sa sumusunod na panggamot upang matulungan
ang pagpapababa ng lagnat.

1. TAGULINAW
      * Pakuluan ng 10 minuto ang isang tasa ng tinadtad na
        sariwang dahon at buong puno sa 2 basong tubig.
      DOSIS:
         Matanda: 1 tasa bawat 4 na oras.
         Bata: (sanggol) 1 kutsara bawat 4 na oras
                  (2-6 na taon) 1/4 tasa bawat 4 na oras
                  (7-12 na taon) 1/2 tasa bawat 4 na oras

2. OKRA
      * Magsangag ng mga tuyong buto at dikdikin ng pino. kumuha
        ng 1/2 tasa at pakuluan ng 15 minuto sa 2 basong tubig.
        palamigin at salain
      DOSIS:
        Matanda: 1 tasa, 3 ulit maghapon pagkatapos kumain.
        Bata: (sanggol) 1 kutsara, 3 ulit maghapon pagkatapos kumain.
                 (2-6 na taon) 1/4 na tasa, 3 ulit maghapon pagkatapos kumain.
                 (7-12 na taon) 1/2 na tasa, 3 ulit maghapon pagkatapos kumain.

3. LAGUNDI
      * Pakuluan ng 15 minuto ang 4 na kutsarang tinadtad na tuyong
        dahon o 6 na kutsarang tinadtad na sariwang dahon sa
        2 basong tubig.
      DOSIS:
         Matanda: 1 tasa, bawat apat na oras
         Bata: (sanggol) 1 kutsara, bawat apat na oras
                  (2-6 na taon) 1/4 na tasa, bawat apat na oras
                  (7-12 na taon) 1/2 na tasa, bawat apat na oras.

PAGKAWALA NG MALAY

     Ito ay pagkadama ng magaan-na-pakiramdam ng ulo at pagkahilo.

PANG-UNANG LUNAS

1. Paupuin ang may karamdaman sa isang silya at ibaba ang ulo sa
    pagitan ng mga tuhod.
2. O kaya ay pahigain na ang ulo ay mababa kaysa kinalalagyan ng
    mga paa. Ito ay upang padaluyin ang dugo sa ulo.
3. Suriin ang pulso at paghinga kung malakas. Kung ang pag hinga
    ay mabilis at malakas ang pulso, kumuha ng supot na papel o plastik na
    may sapat na laki upang dito pahingahin ang pasyente. Kung hindi siya
    muling magkamalay sa loob ng 15 hanggang 20 minuto, dalhin agad
    ito sa pinaka malapit na pagamutan.
4. Kung ang pasyente ay hindi humihinga o kaya ay hindi madama
    ang pulso, pagkalooban ito ng cardiopulmonary resuccitation (CPR)
    Tumawag ng manggagamot o kaya ay dalhin ang pasyente sa
    pinaka malapit sa hospital. Kung may makagawa ng CPR,
    pagkalooban siya nito habang patungo sa pagamutan. Itigil ito kung
    huminga na ang pasyente o kaya ay nadadama na ang pulso nito.
5. Tiyakin kung ang pasyente ay may dayabetis. Tanungin ang
    pamilya.

PAGGAMOT NG HALAMAN
1. ATIS
      * Kung ang pasyente ay humihinga at ang pulso ay malakas.
        lumamukos ng dahon ng atis.
      - Ipa-amoy ito sa pasyente. Ilagay ito sa tapat ng ilong
        hanggang magkamalay ang pasyente.

2. BAYABAS
      * Manglamukos ng mga dahon ng bayabas.
      - Ipaamoy ito sa pasyente habang pinahihinga ito ng malalim.
        ilagay ang linamukos na mga dahon sa tapat ng ilong.

EKSEMA

     Ito ay isang talamak o kaya ay pangmatagalan, di-nakakahawa,
makati at namamaga-magang karamdaman ng balat. Napagkikilala ito
sa pamamagitan ng di-regular at pabagu-bagong kalagayan ng
nanunuklap-nuklap at namamaga-magang sugat sa balat.

PAGGAMOT NG HALAMAN

1. PANDAKAKING PUTI
      * Pakuluan ng 10 minuto ang 3 tasang tinadtad na dahon sa
        isang galong tubig. Dagdagan ng 2 galong mainit na tubig.
      - Ibabad dito ang mga paang may kapansanan.

2. KULITIS
      * Pakuluan ng 15 minuto ang 3 tasang tinadtad na mga
        sariwang dahon sa 5 basong tubig. Basain dito ang isang
        maliit na bimpo
      - Gamitin itong pang-pomento sa eksema sa loob ng 30 minuto.

3. TAKIP-KUHOL
      * Magtadtad ng 10 dahon
      - Itapal sa bahaging may eksema pagkaraan ng pomento o
        pagbabad sa mainit na tubig

4. KAKAW
      * Magsangag ng 10 buto at dikdikin
      - Itapal sa bahaging may kapansanan pagkatapos ng pomento
        o pagbabad sa mainit na tubig